திரையிசைப் பாடல்களில் தமிழ்ச்சுவை (1)

திரையிசைப் பாடல்களில் தமிழ்ச்சுவை (1) - நானாக நானில்லை

ஞாயிற்றுக்கிழமை, 16 ஆகச்டு 2009 20:07 | ஆசிரியர்: கணேஷ் குமார் |

1
2
3
4
5

(13 வாக்களிப்புகள், சராசரியாக 4.62 நட்சத்திரங்கள் - மொத்தம் 5 நட்சத்திரங்கள்)

இசையில் எனக்கு ஆர்வம் அளவுக்கதிகம் என்றாலும் முறைப்படி சங்கீதமோ ஏதாவதொரு இசைக்கருவியையோ கற்றுக்கொள்ள எனக்குக் கொடுப்பினை இல்லை. ஆனாலும் திரைப்பாடல்களில் எனக்கு நாட்டம் வந்ததற்கு காரணம் மெல்லிசை மன்னரின் திரையிசையும் இசைஞானியின் திரையிசையும்தான். கிட்டத்தட்ட என்னுடைய ஏழாம் வகுப்புக்கல்வியிலிருந்தே (கருத்துள்ள) திரையிசைப் பாடல்களை விரும்பிக்கேட்க ஆரம்பித்தேன்.

இசைஞானி இளையராஜாவின் இசைக்கு நான் அடிமையாக ஆரம்பித்தது அப்போதுதான். பாடுபவர்களின் தமிழ்ச்சொற்களைச் சரியாக உச்சரிக்க வைத்து, பாட்டெழுதும் கவிஞர்களிடம் கருத்தான சொற்களைப் பயன்படுத்தச் சொல்லி பாடும் இராகத்தின் இயல்பினை கருத்தோடு இணைத்து, எந்தெந்தக் கருவிகளின் இசை ஒட்டும்; எவையெவை ஒட்டாமல் அபச்சுரங்களைத் தரும் என்பதை உணர்ந்து ஒரு தாய் தன் மகனுக்குத் தயாரிக்கிற உணவினைப் போல் சரிவிகித அளவினில் கலந்து தரும் அந்த இசைச்செம்மல் பாடல்களில் எனக்கே தெரியாமல் என்னை இழந்தது இந்தப் பிறவியில் நான் கண்ட பேரின்பம்.

கிட்டத்தட்ட 150 பாடல்களுக்கும் மேல் மனதில் முழுவரிகளையும் அடக்கியிருக்கிறேன். இங்கே அவைகளின் சொல்லாட்சி மற்றும் இசைச் சின்னங்களை நான் எழுதப்போகிறேன். இந்தப் பாடல்கள் முழுக்க முழுக்க அழகான தமிழ் வரிகளாலானவைதான். நம் தாய்த் தமிழில் எத்தனையோ புலவர்கள் எழுதினாலும், கவிஞர்கள் கவிபாடினாலும் அவைகளின் உட்கருத்துக்கள் படிக்காத பாமரனையும் சென்றடைந்தது இந்தத் திரைப் பாடல்கள் மூலமாகத்தான். இந்தத் தொடரில் இதுவரை நீங்கள் கேட்டிருக்கும் பாடல்களும் இருக்கும், அதிகம் கேட்காத பாடல்களுமிருக்கும். ஆனால் இதைப் படித்ததும் அந்தப் பாடல்களைத் தேடிக்கேட்டுப்பாருங்கள். அந்தச் சொற்களின் சுகம் உங்களுக்குப் புரியும்; இசையின் குழைப்புகள் விளங்கும். ஏன் இங்கே இந்த புல்லாங்குழல் வந்தது, எதற்காக இந்த வீணைச் சுவடு, என்பதெல்லாம் நீங்கள் அறியவிழைவீர்கள்

இசைஞானியின் இசையில் தூங்காதே தம்பி தூங்காதே என்னும் திரைப்படத்தில் பாலசுப்பிரமணியம் அவர்கள் பாடிய கவிஞர் வாலியின் இந்தப்பாடல் தான், நான் விரும்பிப் பாடிப்பழகிய முதல் பாடல். அதுவும் நம்மைப் பெற்ற தாயினை வாழ்த்திப் புகழ்பாடும் பாடல்.

நம்மைப் பெற்றவள் நமக்குச் செய்யும் சேவைகளைக் காணும்போது நாம் யாராவது அந்த அன்பை முழுவதும் புரிந்துகொண்டிருக்கிறோமா? என்றால், இல்லை என்றுதான் சொல்லவேண்டும். ஆனால் ஒரு பத்து நாட்கள் சோறே கிடைக்காமல் வரட்டு ரொட்டியில் மைதாப்பிசினை ஊற்றித் தக்காளிப் பிசிறல்களைச் சிதறி (அது வேறொன்னும் இல்லைங்க Pizza தான்) தின்னும் ஊருக்குச் சென்றுவிட்டு வந்துபாருங்கள். தாயிடும் உணவில் உலகம் தெரியும். அவள் அன்பின் உண்மை விளங்கும். பத்து மாதம் சிப்பிக்குள் வளரும் முத்துப்போலத் தான் சீரழிந்தாலும் கருத்தாய் வளர்த்துப் பெற்றெடுத்துத் தாலாட்டிச் சீராட்டிச் சோறூட்டி வளர்ப்பவர் தாய்தான். அதை உணரும்போது இந்தப்பாடலின் பல்லவியின் இயல்பான வரிகள் கூட இனிமையாகத் தோன்றும்.

நானாக நானில்லை தாயே
நல்வாழ்வு தந்தாயே நீயே
பாசம் ஒரு நேசம்
கண்ணாரக் கண்டானுன் சேயே

உண்மைதான் எதையும் எதிர்பார்க்காத பாசத்தையும் நேசத்தையும் வேறுயாரிடத்தில் காணமுடியும் என்கிறீர்கள்தானே.

தினமும் காலை எழும்போது நமக்குமுன் எழுந்து தாய் செய்த வேலைகளையெல்லாம் கண்திறக்கும் முன், மூக்கில் சாம்பிராணிப்புகையாய் உணர்ந்திருப்போம், குழம்பியில் (Coffee) பாலுடன் அன்பையும் கலந்துதரக் கண்டிருப்போம், வாசலில் வந்து நின்றால் கலையும் நயமும் கலந்த தாயின் மாக்கோலத்தில் கண்டிருப்போம், குளித்துவிட்டுத் தலைதுவட்டிவிடும் வேகத்தில் கண்டிருப்போம். அப்போதெல்லாம் நம் தாய் எங்கும் நிறைந்திருப்பாள் என்ற எண்ணமே இந்தப் பாடலின் முதற் சரணம். விடிந்ததும் வரும் ஒளி, கூட்டினை விட்டு குஞ்சுகளுக்கு இரைதேட வரும் கிளி எங்கும் தாயின் உருவம் தெரிவதாக இந்தவரிகள் உணர்த்துவது உங்களுக்கு விளங்குகிறதா? வள்ளலாரின் வாடும் பயிரை கண்டபோதெல்லாம் வாடும் மனம் தெரிகிறதா?

கீழ்வானிலே ஒளிவந்தது
கூண்டைவிட்டு கிளிவந்தது
நான் பார்க்கும் ஆகாயம் எங்கும்
நீ பாடும் பூபாளம்
வாடும் பயிர் வாழ
நீதானே நீர்வார்த்த கார்மேகம்

காலையில் பள்ளிக்கோ, கல்லூரிக்கோ அல்லது பணியிடத்துக்கோ புறப்பட்டுப் போகும் தன் மகன்/மகள் திரும்ப வரும் காலத்தினை எதிர்நோக்கி திண்ணையில் காத்திருக்கும் தாய், தன் குழந்தை எவ்வளவு வித்தியாசமான மனிதர்களை வெளியுலகத்தில் சந்திக்கிறது என்பதை அறியாதவர்.

சிட்டாய்ப் பறக்கும் நம் சிந்தனைகள் வேறு, கட்டுப்பட்டுக் கிடக்கும் தாயின் சிந்தனை வேறு. ஆனாலும் எல்லாப் புதுமைகளையும் வெளியுலகத்தில் நாம் பெற்றுக்கொண்டாலும் தாயின் மடிபோலொரு மகிழ்விடம் நமக்குத் தோன்றுவதில்லையே ஏன்? உயிர் நட்போ அல்லது காதலிக்கும் உறவோ எதையோ நம்மிடத்தில் எதிர்பார்க்கிறார்கள். குறைந்தது நல்லவனாக, உதவிசெய்பவனாக இருக்கவேண்டுமென்றாவது எதிர்பார்க்கிறார்கள். ஆனால் தாயோ அவருக்கு நாம் தொல்லை கொடுத்தாலும், சீரகப் பெட்டிக்குள்ளிருந்து காசெடுத்துப் போய் கமர்க்கட்டு வாங்கித் தின்றாலும், அவர் அழகாய் அடுக்கிவைத்திருந்த புத்தககங்களைச் சரித்துவிட்டாலும் மறுநாழிகையில் அதெல்லாம் மறந்து அன்புகாட்டும் தன்மைதான் அதற்குக் காரணம். இந்த வரிகளில் கவிஞர் தாயைக் கொஞ்சம் உயர்த்தி தெய்வத்தோடு வைக்கிறார்.

மணிமாளிகை மாடங்களும்
மலர்த் தூவிய மஞ்சங்களும்
தாய் வீடு போலில்லை
அங்கு தாலாட்ட ஆளில்லை
கோயில் தொழும் தெய்வம்
நீயன்றி நான்காண வேறில்லை

பல்லவியின் முதலிரண்டு வரிகளுக்கப்புறம் கவனித்தீர்களானால் பாசம் ஒரு நேசம் என்பது இருமுறை பாடப்படும். அதில் பாலசுப்பிரமணியம் அவர்களின் குரலில் வெளிப்படும் உணர்வினை அனுபவித்துப்பாருங்கள். அதே உணர்வினை இரு சரணங்களிலும் நீதானே நீர்வார்த்த கார்மேகம் மற்றும் நீயன்றி நான்காண வேறில்லை எனும் கடைசிவரிகளில் தொடரச்செய்திருப்பார் இசைஞானி இளையராஜா.

அடுத்த முறை இந்தப்பாடலைக் கேட்கும் போது அமைதியான சூழலில் ஆழ்ந்து கண்களை மூடிக் கேளுங்கள். நான் சொன்னவை, எனக்குத் தெரிந்தவை; ஆனால் நீங்கள் கேட்கையில் உங்களுக்குப் புதிய உணர்வுகள் உண்டாகலாம். அதனை எனக்கு எழுதுங்கள் இந்த ஆக்கத்தில் உங்கள் பெயருடன் இணைத்துக்கொள்கிறேன்.

தொடரும்...

புதிய

கருத்துரைகள் (8)

|2009-08-17 08:15:10 சரண்யா கோபாலகிருஷ்ணன்

இந்தப் பாடலை நான் கேட்டிருக்கிறேன், ஆனால் இவ்வளவு கருத்துக்கள் இதில் இருக்குமென நான் நினைத்துப்பார்த்ததில்லை பதிவிற்கு நன்றிகள். படித்ததில் மகிழ்ச்சி. இந்த நேரத்தில் என் தாயைப் பிரிந்திருப்பதை நான் உணர்கிறேன்!!

|2009-08-18 20:28:53 பிரகாஷ் அய்யப்பன் - பாராட்டுக்கள்

தமிழுக்கும், தமிழ் திரைபாடலும் ஒரு இணையத்தை உருவாக்கியதற்கு என் முதற்கண் பாராட்டுக்கள். தமிழ் அழகு... அதிலும் இசையோடு சேரும் போது மிகவும் அழகு.

ஒரு சிரிய விண்ணப்பம்:
இந்த பாடலை எழுதியவர் யார் என்றும் நீங்கள் குறிப்பிட்டு இருக்கலாம்.

|2009-08-19 10:20:20 யாரோ

ஆக திரும்ப பாடல்களுக்கு வந்துவிட்டீர்கள்...

|2009-08-19 10:22:57 அருண் செந்தில் - just a correction

நல்ல ஆக்கம். கணேஷ், நீங்கள் இசையில் இவ்வளவு ஆர்வமாக இருப்பீர்கள் என்று நான் நினைக்கவில்லை...தொடர்க.. ஒரு சின்னத் திருத்தம்... இந்தப் பாடல் "தூங்காதே தம்பி தூங்காதே" என்ற திரைப்படத்திலிருந்து....

|2009-08-19 20:49:07 கௌரிசுரேஷ் - wonderfull wordings

கணேஷ்,
இளையராஜாவின் இசையினைக் கேட்க என்னைப் பின்னோக்கி அழைத்து சென்றது இந்தக் கட்டுரை. தொடர்ந்துவரும் பகுதிகளைப் படிக்க மிகவும் ஆர்வமாக உள்ளேன். நன்றாக எழுத வாழ்த்துக்கள்.

|2009-08-19 20:40:00 கணேஷ் குமார் - திருத்தம் செய்யப்பட்டது

மேற்கோளிட்டது:
ஆக திரும்ப பாடல்களுக்கு வந்துவிட்டீர்கள்...

ஏன் உங்களுக்குப் பாடல்களே பிடிக்காதா... இல்லை நான் பாடல்களைப் பற்றி எழுதக்கூடாதா? எல்லோரும் கருத்தில்லாத பாடல்களைப் பற்றி வசைபாடி எழுதுகையில், நல்ல கருத்துக்கள் எங்கிருப்பினும் ஏற்றுக் கொள்ள வேண்டாமா?

மேற்கோளிட்டது:
இந்த பாடலை எழுதியவர் யார் என்றும் நீங்கள் குறிப்பிட்டு இருக்கலாம்

மேற்கோளிட்டது:
ஒரு சின்னத் திருத்தம்... இந்தப் பாடல் "தூங்காதே தம்பி தூங்காதே"

பிரகாஷ் ஐயப்பனுக்கும், அருண் செந்திலுக்கும் என் நன்றிகள். ஆக்கத்தில் உங்கள் வேண்டுகோள் நிறைவேற்றப் பட்டுவிட்டது.

|2009-08-21 23:21:11 சரவணப் பெருமாள்

கவிஞர் வாலின் அல்ல வாலியின்....

உண்மையில் அருமையான பாடல்

|2009-08-24 14:02:13 பழனிவேல்ராஜன் T - மிகவும் அருமை ஐயா

நானறிந்த வகையில் இது ஒரு புதிய முயற்சி. மிக நயமாக பாடல்களின் கருத்துக்குகளை இது உணர்த்துகிறது... மேன்மேலும் சிறக்க வாழ்த்துக்கள்.
ஒரு சிறிய விண்ணப்பம் ஐயா, "நினைப்பதெல்லாம் நடந்துவிட்டால் தெய்வம் ஏதுமில்லை" எனும் 'நெஞ்சில் ஓர் ஆலயம்" படப் பாடலில் மெல்லிசை மன்னர்கள் இசைக்கு கவியரசர் கண்ணதாசன் வரிகளைப் பல சூழல்களில் கேட்டு இரசித்திருக்கிறேன்.
ஆனால் ஒவ்வொரு சூழலிலும் ஒவ்வொரு கருத்தைப் புரியவைக்கிறது. எனவே சமயம் கிடைக்கும்போது உங்களால் இதன் கருத்துக்களைப் புரிந்து பின் பகிர்ந்துகொள்ள வேண்டுகிறேன்.
நன்றி!!!