இன்னொருவர் பிணத்தைப் பிடுங்கித்தின்னும் இடிஅமீன்கள் வாழ்ந்த புவியாயினும் அதுபோலொரு வரலாற்றை இந்தியத்துணைக்கண்டத்தில் நாம் இதுவரை கண்டதில்லை. ஆனால் ஆங்காங்கே இதுபோன்ற நிகழ்வுகள் கடந்த சில ஆண்டுகளாகத் தலைதூக்க ஆரம்பித்துள்ளது. இதை சோற்றுக்காகத் திருடும் திருடர்கள் செய்வது இயல்பு. ஆனால் மருத்துவமனையும் மருத்துவர்களும் செய்வது கேட்பவர் நெஞ்சை வெடித்துச் சிதறடிக்கும் செய்தி. என் வாழ்வில் நான் இழந்தவைகளையெல்லாம் மீட்டுக்கொள்ளமுடியுமென்று என் உள்மனம் சொன்னாலும், என் மகனைக் கோயமுத்தூர் கு.நா மருத்துவமனையில் இழந்தது எனக்கு பெருத்த இழப்பு. இந்தப்பிறவியில் ஈடுசெய்ய இயலாத ஒரு இழப்பு. ஒவ்வொருவரும் படிக்கவேண்டிய, தெரிந்துகொண்டு மற்றவருக்கும் தெரியப்படுத்த வேண்டிய செய்தியாக பனித்துளிகள் தளத்தில் வெளியிடுகிறேன்.

மிகநீண்ட புரதான வரலாற்றுக்குச் சொந்தமான இந்திய சமூகம் பணப்பேராசையால் ஊழல் மயமாகிவிட்டது. கையூட்டு மற்றும் ஊழலில் இந்தியா புவியில் மூன்றாவது இடத்தில் உள்ளதாக சர்வதேச நிறுவனங்கள் சான்று வழங்கியுள்ளன! ஊழல், சமூக வாழ்வில் மரியாதைக்குரிய அங்கமாகிவிட்டது. அறவியல் பண்புகள் புத்தகங்களில் முடங்கிப்போயின. அனைத்து துறைகளிலும் கடமை தவறுவதே கடமையாகிப் போனது. வழிபாடுகள் சடங்குகளாகி விட்டன. காணிக்கைகள் லஞ்சமாகிவிட்டது. லஞ்சம் காணிக்கையாகிவிட்டது. சொல்லும் செயலும் துருவங்களாகிவிட்டன.

மருத்துவத்துறை லாபமீட்டும் நிறுவனமாகிப் போனது. லாபத்தையே முதன்மை நோக்கமாகக் கொண்ட மருத்துவ மனைகள், இவற்றிற்கு கட்டுப்பட்டு இயங்க வேண்டியதால் இருமடங்கு பேராசைகளுடன் அலையும் மருத்துவர்கள். நோயாளிகள் பொன்முட்டையிடும் வாத்துகள். அதிர்ஷ்ட்டம், துரதிர்ஷ்ட்டம், விதியின் விளையாட்டு, ப்ராப்தம் போன்ற சொற்கள் மருத்துவ மனைகளிலும் நோயாளிகளின் இல்லங்களிலுமே அதிகம் புழக்கத்தில் உள்ளன.

என் மகன் ஆனந்த் குமார். 26 வயதில் ஒரு கர்மயோகி. இது அவருடன் பழகியோர், பணியாற்றியோர், நண்பர்கள் சொல்வது. அவரின் இதய ஆரிக்கிள் சுவரில் குறைபாடு[ASD]. அத்துடன் நுரையீரல் ரத்த நாள அழுத்தம் அண்மைக்காலதில் அதிகரித்துள்ளது. இது அவருக்கு எந்த அறிகுறிகளையும் காட்டாமல் இருந்துள்ளது. கடைசியாக அவர் பணியாற்றியது ஆரக்கிள் (ORACLE) மென்பொருள் நிறுவனத்தில். மருத்துவ மனைக்கு சிகிச்சைக்காக சென்ற 16-7-2009-க்கு முன், ஒரு மாதம் கிட்டத்தட்ட நாளும் நள்ளிரவுவரை பணியாற்றியுள்ளார். நாளும் 35 கி.மீ பெங்களூர் சலைகளில் இரு சக்கர வாகனத்தில் சென்று வந்துள்ளார். இக்காலங்களில் அவர் தமக்கு உடல் நலமில்லை என்று சக பணியாளர்களிடமோ, நண்பர்களிடமோ, குடும்பத்தாரிடமோ தெரிவித்ததில்லை. நாளாந்த பணிகளை எப்போதும் போல் செய்து வந்துள்ளார்.

அவர் தம் வாழ்நாளில், பிறந்த வருடத்தில் சிறிய அளவில் தோன்றிய மூச்சுக்கோளாறுகளுக்கு மருத்துவம் பார்த்ததோடு சரி. பிறகு மருத்துவரிடமோ, மருத்துவ மனையிலோ மருத்துவம் பார்த்தது கிடையாது. சளி, காய்ச்சல், தலைவலி என்று ஏதும் வந்தால் பக்கத்து வீட்டு கம்பவுண்டரிடம் தான் மருத்துவம். அன்மைக்காலதில் செய்த உடல் பரிசோதனையின் போதுதான் மேற்படி குறைபாடு தெரியவந்தது. அதை சரி செய்து கொள்ளத்தான் அவர் தற்போது மருத்துவ மனைகளுக்குச் செல்ல வேண்டி வந்தது. பெயர் பெற்ற பெரிய மருத்துவ மனைகள், பெயர்பெற்ற மருத்துவர்கள். அனைத்து சோதனைகளும் நடைபெற்றன. பணிவிபரங்கள் குடும்பப்பின்ணனிகள் விசாரிக்கப்பட்டன. இதன் மூலம் நோயாளியின் வசதிவாய்ப்புகளும் தெரிந்து கொள்ளப்படுகின்றன. தம்மை நாடி வந்த நோயாளியை விட்டுவிடக்கூடாது. உள்நோயாளியாக அனுமதித்து பணம் பறிப்பது முதன்மை நோக்காகவும், நோயாளி குணம் அடையவேண்டும்

என்பது அடுத்த கட்டத்திற்கும் போய்விடுகிறது. நோயின் தன்மை குறித்தும் அதனால் ஏற்படப்போகும் விளைவுகள் குறித்தும் மிகக் கடுமையாக எச்சரிக்கப்பட்டன. அறுவை சிகிச்சை உடனடித்தேவை. அது மிக எளிமையானது. அறுவை சிகிச்சைக்குப்பின் 15 நாள் ஒய்வு போதும். பின் வழக்கம் போல் பணிகளுக்கு செல்லலாம். திருமணம் மட்டும் ஓராண்டு கழித்து செய்வது நல்லது என்றெல்லாம் சொல்லி உடனடி அறுவை சிகிச்சைக்கு தயார் படுத்தினார்கள். உயிரச்சத்தினால் உடனடியாக சம்மதித்தோம்.

வலைத்தளங்களில் பன்னாட்டு மருத்துவர்களின் அனுபவங்களும் ஆய்வுகளும் நிறையவே பதிவு செய்யப்பட்டுள்ளன. நுரையீரல் ரத்தநாள அழுத்தம் இருக்கும் போது இந்த அறுவை சிகிச்சை ஆபத்தானது. கூடாது. நுரையீரல் ரத்த நாள அழுத்தம் குறைய மருந்துகள் பரிந்துரைக்கப்படவேண்டும் . அதுவே வேறு உடல் நலப் பிரச்சனைகள் இல்லாத பட்சத்தில் இந்நோயாளிகளில் பலரை 60 ஆண்டுகள் வரையிலும் கூட நன்னிலையில் வாழவைக்கும் என்கிறது.

‘Surgery that is used to repair the defect can’t be used after Pulmonary Hypertension has developed because the change in blood Pressure would further damage the heart’
-The regents of the University of California.

‘In the advanced stage of the PAH, closure of the ASD will eventually lead to Deterioration of the clinical condition and a decreased survival in these patients’
-Pediatric and Congenial Cardiology. University Medical Centre, Groningen Nethrlands.

அமெரிக்க நாட்டின் உணவு மற்றும் மருந்துகட்டுப் பாட்டுக்கழகம் கூட AMBRISENTAN, BOSENTAN, EPOPROSTENOL SODIUM, ILOPROSET, SILDENAFIL,TREPROSTINIL ஆகிய மருந்துகளை PAH-க்கு நல்லதென அனுமதித்துள்ளது.

1. 24-7-2009 காலை அறுவை சிகிச்சை. 26-7-2009காலை ஐ.சி.யு. வில் இருந்து அறைக்கு. அன்று முழுக்க அவர் உண்ணவில்லை. சரியாக உறங்கவில்லை. இதெல்லாம் மயக்க மருந்தின் குணம். அப்படித்தான் இருப்பார் என்று செவிலியர்கள் சொல்லிக் கொண்டிருந்தனர். எந்த மருத்துவரும் அறைக்கு வரவில்லை, நோயாளின் நிலை குறித்து எங்களுக்கு எந்த அறிவிப்பும் இல்லை. செவிலியர் இருமுறை ரத்த அழுத்தம் பார்த்தனர்.
2. 27-7-2009 அதிகாலை 3.30 மணிபோல் அவர் நினைவு தடுமாறியது. பதறினோம் செவிலியர் வந்தனர். ஐ.சி.யு மருத்துவர் வரவழைக்கப்பட்டார். ஐ.சி.யு விற்கு எடுத்துச் சென்றனர். வழியிலேயே நினைவு திரும்பியது. எழுந்து அமர்ந்து கொண்டு தூங்குகிறவனை ஏன் தொல்லை செய்கிறீர் என்று கேட்டார். நம்பிக்கை வந்தது. ‘ஒன்றுமில்லை, சாதாரண மயக்கம்தான் பயப்படவேண்டாம், அறுவை சிகிச்சை செய்த மருத்துவர் காலையில் வந்தபின் வார்டுக்கு அனுப்பி விடுவோம்’ என்றுமட்டும் மேற்படி மருத்துவர் சொன்னார். காலையில் இருந்து அவர் ஏதும் சரியாக சாப்பிடவில்லை. அதனாலும் இருக்கலாமோ என்று நினைத்தோம். எங்களுக்கும் வேறு சந்தேகங்கள் வரவில்லை.
3. காலையில் அந்த மருத்துவர் வந்தார். திரும்புகையில் பின் சென்றேன். ஒன்றுமில்லை வார்டுக்கு வந்துவிடுவார் என்றுமட்டும் சொல்லிச்சென்றார். அன்று காலை இட்லி சாப்பிட்டார். அறைக்கு அனுப்பிவிட்டனர். மதிய உணவு, இரவு சிற்றுண்டி இடையில் திரவ உணவுகள் எடுத்துக்கொண்டார். அவ்வப்போது கொஞ்சம் தூக்கம். வந்தவர்களிடம் பேச்சுகள். எங்களுக்கு அவர் நலம் குறித்து எந்த ஐயமும் எழவில்லை. அன்றும், பகலிலும் இரவிலும் எந்த மருத்துவரும் அறைக்கு வரவில்லை. உயிர்காக்கும் உறுப்புகளின் செயல்பாடுகள் எப்படி உள்ளன என்பதற்கு எந்த சோதனையும் நடைபெறவில்லை.
4. 28-7-2009 காலை 500 அடிவரை நடந்தார். காலை 4.00 மணிக்கு பிறகு சிறுநீர் கழிக்கவில்லை. 8.30 மணிபோல் அறுவை மருத்துவர் வந்தார். இதனை சொன்னோம். செவிலியரிடம் ரத்த பரிசோதனைக்கு பணித்தார்.புண்கள் சரியாகிவிட்டது. பேண்டுகள் எடுக்கப்பட்டுவிடும். வெந்நீர் வாங்கி குளிக்க வையுங்கள் என எங்களைப் பணித்தார். ஆனந்த் குமார் இட்லி- பொங்கல் சாப்பிட்டார் . மகிழ்ந்தோம். மருத்துவர் ஸ்டெதஸ்கோப் வைத்துக் கூட சோதிக்கவில்லையே என்பது குறித்து நாங்கள் அப்போது யோசிக்கவில்லை.
5. 11.00.மணிக்கு பிசியோதெராபிஸ்ட் வந்தார். பயிற்சிகள் செய்யவைத்தார். நடக்கவைத்தார். முதுகை நன்கு தட்டிவிட்டார். அப்போதெல்லாம் கூட வலியேதுமில்லை என்றுதான் தெரிவித்தார். குளிப்பாட்டி விட்டோம். குளித்ததனால் நன்றாக உள்ளது என்றார். திரவ உணவு எடுத்தார். மதியம் செல்லச் செல்ல சோர்வு தட்டியது. மதிய உணவை மறுத்துவிட்டார். சிறுநீரும் கழிக்கவில்லை. செவிலியரிடம் திரும்ப திரும்ப சொன்னோம். கவனிப்பில்லை. மாலை 4.30 மணிக்குமேல் ஐ.சி.யுக்கு எடுத்துச் சென்றனர். அங்கிருந்த மருத்துவர் சிறுநீரகங்கள் செயலிழ்ந்து விட்டன என்றார். அச்சத்தில் உறைந்து போனேன். எப்படி திடீரென இம்மாதிரி சொல்கிறார், என்பது அவர் இறந்து 10 நாட்கள் கழித்து, மருத்துவ அறிக்கைகளை வாங்கி [இதற்கும் பணம் கட்டினோம்] பார்த்த பின் தான் தெரிந்தது. காலையில் எடுத்த ரத்த பரிசோதனை அறிக்கையை மாலையில்தான் பார்த்துள்ளார்கள். என்னே கடமை உணர்வு! என்னே மனிதாபிமானம்.! இந்த அறிக்கையைத்தான் இறப்புஅறிக்கையிலும் [DEATH SUMMARY] காட்டியுள்ளனர். இதன் படியே ரத்தத்தில் யூரியாவும், கிரியாட்டினினும் அதிக பட்சத்தில் நான்கு மடங்குக்குமேல் உயர்ந்துள்ளது. மாலை ஐந்து மணிக்கு இது இன்னும் பல மடங்கு உயர்ந்து ரத்தம் நஞ்சாகி சாவின் விளிம்புக்கு சென்றிருப்பார்.
6. இதன் பின் நடத்தப்பட்ட சிகிச்சைகளாக இறப்பு அறிக்கையில் சொல்லப்பட்டவைகள், அப்பாவி நோயாளியை வதைத்து, மருத்துவர்கள் தெரிந்து கொள்ள நடத்தப்பட்ட வெறும் பரிசோதனைகளே. இதன் உச்சகட்டம் தான் மறுஆப்ரேசன் மூலம் இதயச்சுவரை முன் இருந்த நிலைக்கே கொண்டுவந்தது[reexplored and perforate the patch.]

Any Anesthesia and surgery [ASD with PAH] is considered high risk and should be carefully planned எனும் போது முதலில் அறுக்கும் போதே எந்தவித ஆலோசனைகளும் இன்றி அறுத்து எந்தவித கவனிப்பும் இன்றி நான்கு நாட்கள் விட்டுவிட்டார்கள். ரத்த உறைவுகள்[EMBOLISM] அப்போதே தொடங்கி உயிர்காக்கும் உறுப்புகள் செயலிழந்து விட்டன என்பதை காலை செய்த ரத்த பரிசோதனை தெரிவிக்கிறது. இந் நிலையில் மீண்டும் அனஸ்தீசியா மீண்டும் அறுப்பு என்றால் என்ன கொடுமை? எப்படி பிழைப்பார்? ஆக செய்யப்பட்டவை இவர்களுக்கு தேவையான சோதனைகளே.

இரவு 7.40க்கு இறந்ததாக அறிவிக்கப்பட்டது, என்று இறப்பு அறிக்கையை தாயாரித்து தந்துள்ளனர். 7.00 மணிக்கே மருத்துவர்கள் தம் ஆய்வுகளை முடித்துக்கொண்டு வெளியேரி விட்டனர். பணம் பிடுங்குவது தான் முதல் நோக்கம் . மருத்துவம் பார்த்து குணப்படுத்தலாம் எனும் கடமை உணர்வு அறவேஇல்லை.

• மருத்துவர் நோயாளின் அறைக்கு மூன்று நாளில் ஒரு தடவை மட்டுமே வந்தார்.
• வந்தவரும் ஸ்டெதஸ்கோப்பை கூட பயன் படுத்தவில்லை.
• நோயாளியின் உயிர் காக்கும் உற்றுப்புகளின் செயல்பாடு குறித்து எந்த சோதனையும் செய்து பார்க்கவில்லை.
• அறுத்து தைத்தார்கள். தைத்ததை அறுக்க மீண்டும் அறுத்தார்கள். மீண்டும் தைத்தார்கள். இதுதான் மனிதாபிமான மருத்துவம் என்பதா?
• இதய அறுவை சிகிச்சையின் போது உயிர்காக்கும் உறுப்புகள் பாதிக்க படலாம் என்பது மருத்துவர்கள் அறியாததா? ஏன் எந்த நிபுணரும் வந்து பார்க்கவிலை?
• அறுவை சிகிச்சையின் போதே ரத்த உறைவுகள் ஏதும் ஏற்பட்டதா? உயிர் காக்கும் உறுப்புகளுக்கு ரத்தம் சென்றதா? IMCU- வில் வைத்து ஏன் கண்காணிக்கவில்லை?
• HEPATO RENAL FAILURE - எப்படி திடீரென ஏற்படும்?
• காலையில் எடுத்த ரத்த சோதனை அறிக்கையை மாலை வரை ஏன் பார்க்கவில்லை? நிலமை மிக மோசம் அடைந்த பின்னால் சோதனைகள் நடத்த விட்டுவைக்கப்பட்டதா?
• நாங்கள் திரும்பத் திரும்ப கேட்டும் எந்த செவிலியரும் ஏன் செவிசாய்க்கவில்லை? 26-7-2009 காலை கடன்களுக்காக BEDPAN கேட்டபோது ஏன் உடனே தரவில்லை? செவிலியரிடம் கெஞ்சியும் 1 மணிநேரம் கழித்துத்தானே தரப்பட்டது. அதனால் காலை சிற்றுண்டி சாப்பிட முடியாமல் போனது. வெறும் வயிற்றில் சாப்பிட்ட மாத்திரைகள் வாந்தியானது. IMCU- க்குள்ளேயே இப்படியான கடமை உணர்வு.
• அறுவை சிகிச்சைக்கு பின் 24.00 மணி நேரம் கழித்து PAHக்கு மாத்திரை கொடுத்தோம். உடம்பு ஏற்றுக்கொள்ளவில்லை விலக்கிக்கொண்டோம் என்கின்றனர். மாற்று மாத்திரைகள் ஏன் கொடுக்கப் படவில்லை? இதை அறுவை சிகிச்சைக்கு முன்பல்லவா செய்திருக்கவேண்டும்? அப்படி செய்திருந்தால் லட்சக் கணக்கில் பணம் வாங்க முடியாது என்பதனாலா?

பணம் இன்னும் லட்சம் கேட்டிருந்தாலும் தரத்தானே போகிறோம். கடைசியாக மருத்துவர்கள் செய்து பார்த்த சோதனைகளுக்கும் பணம் கட்டியபின்னால் உடம்பைத் தந்தார்கள். பணத்தாசை இல்லை என்றால் வெளிமருத்துவ மனையில் செய்யப்பட்ட cath study- ஐ அப்படியே ஏற்றுக்கொண்டதால் அதற்கான தொகை RS 20500/-. ASD/VSD SURGERY 8 நாள் PACKAGE-ல் வருகிறது. மொத்த தொகை RS 1,04,500/-. எங்களை ஒரு நாள் முன்னதாகவே காலி செய்து விட்டதால் அதனால் மிச்சமான தொகை ஆகியவற்றை ஏன் திருப்பித் தரவில்லை? குறைந்த பட்சமாக மருத்துவமனைக்கான மருத்துவ அற்றிக்கைகளின் ஜெராக்ஸ் காப்பிகளுக்கு எம்மிடம் பணம் வாங்காமல் தந்திருக்கலாம். ஆனால் மருதுவமனை மனிதாபிமானம் அதற்கும் இடம்தரவில்லை.

மகனை இழந்த பின்னால் நான்கு நாட்கள் கழித்து அறுவை சிகிச்சை செய்த மருத்துவரை நேரில் சென்று சந்தித்தேன். ஒரு வருத்தம் கூடத்தெரிவிக்கவில்லை. அந்த மனிதாபிமானம் இருந்திருந்தால் ஆனந்த் குமார் உயிர்வாழ மருத்துவம் பார்த்திருப்பர். குறைந்த பட்சம் இறந்த நேரத்தில் அருகில் இருந்து நடந்ததையும், செய்த மருத்துவ முயற்சிகளைவும் விளக்கியிருப்பார். கேட்ட எந்த கேள்விக்கும் பதில் இல்லை. கல்லுளிமங்கன் என்பதற்கு அன்றுதான் சரியான பொருள் தெரிந்துகொண்டேன்.ஆனந்த் குமார் நல்லபடி வேலைக்கு சென்று கொண்டிருந்தார். வருமுன் காப்போம் என மருத்துவர் சொற்படி கேட்டோம். மகனைப் பறி கொடுத்தோம். தாங்கிக் கொள்ள முடியவில்லை. நிச்சயம் தவறு நடந்திருக்கிறது என நம்பி வலைத்தளங்களில் தேடினேன். மனிதாபி மானமற்ற மருத்துவம் எம் மகனை பலிகொண்டுவிட்டது என்பது தெளிவாகத் தெரிகிறது.

மருத்துவர்களையும் மருத்துவ மனைகளையும் எச்சரிக்கையோடு அணுகுங்கள்.

எம்நிலை யாருக்கும் வரவேண்டாம்!

கண்ணீருடன்,

கருத்துரைக்கவும்

உங்கள் தொடர்பு விவரங்கள்:

பெயர்:

மின்னஞ்சல்: தெரிவிக்க அல்லதெரிவிக்கவும்

கருத்துரை:

தலைப்பு:

எழிற்குறிகள்:         -நிறம்-நீர்நீலம்கறுப்புநீலம்இளஞ்சிவப்புபழுப்புபச்சைஎலுமிச்சைகருஞ்சிவப்புகடற்படைநீலம்ஆலிவ்ஊதாசிவப்புவெள்ளிநீலப்பச்சைவெள்ளைமஞ்சள் -அளவு-மிகச்சிறியசிறியநடுவாந்திரபெரியமிகப்பெரிய

கருத்துரை:

Security

படத்திலிருக்கும் ஆங்கிலக் குறியீட்டுச்சொல்லை உள்ளிடவும்.

!joomlacomment 4.0 Copyright (C) 2009 Compojoom.com . All rights reserved."