இந்தியாவில் செல்போன் பயன்படுத்துவோரின் எண்ணிக்கை நாளுக்கு நாள் அதிகரித்து வருவதால் பழைய செல்போன்களை குப்பையில் போடுவதற்கு பதிலாக அவற்றை மறுசுழற்சி செய்யும் முறையை மக்களிடம் அறிமுகப்படுத்த வேண்டியது அவசியம்.

இதற்காக நோக்கியா நிறுவனம் 'டேக்-பேக்' என்ற மறுசுழற்சி திட்டத்தை கடந்த ஜனவரியில் சோதனை அடிப்படையில் டெல்லி, பெங்களூர், குர்கான், லூதியானா ஆகிய நகரங்களில் அறிமுகம் செய்தது.

இந்த திட்டம் அறிமுகம் செய்யப்பட்ட 45 நாட்களில் 10 ஆயிரம் செல்போன்கள் கொண்ட 3 டன் கழிவுகள் கிடைத்தன. நோக்கியா செல்போன்களை மறுசுழற்சி செய்வதன் மூலம் 80 ஆயிரம் டன் மூலப்பொருட்களை பெறமுடியும். இந்த திட்டம் தற்போது சென்னையிலும் தொடங்கப்பட்டுள்ளது.

இதேபோன்று, செல்போன்களை மறுசுழற்சி செய்ய விரும்புகிறவர்களின் வசதிக்காக சென்னையில் 31 நோக்கியா ஷோரூம்களில் மறுசுழற்சி பெட்டிகள் வைக்கப்பட்டுள்ளன. இதுதொடர்பான விவரத்தை அறிந்து கொள்ள நோக்கியா வாடிக்கையாளர்கள் தங்களது செல்போனில் இருந்து 55555 என்ற எண்ணுக்கு green என்று எஸ்.எம்.எஸ். அனுப்ப வேண்டும்.

மறுசுழற்சி செய்யப்படும் ஒரு செல்போனுக்கு ஒரு மரக்கன்று வீதம் நடுவதற்கு திட்டமிட்டு உள்ளார்கள். இதற்காக சென்னை மற்றும் பெங்களூரில் உள்ள தன்னார்வ தொண்டு நிறுவனங்களுடன் இணைந்து அந்த இரு நகரங்களிலும் 22 ஆயிரத்து 500 மரக்கன்றுகள் நடுவதற்கு ஒப்பந்தம் செய்துள்ளார்கள்...

இந்த திட்டம் அடுத்த மாதம் கோவை, ஐதராபாத், பெங்களூர், பூனா, அகமதாபாத், மும்பை, கொல்கத்தா, கவுகாத்தி, புவனேஸ்வர், சண்டிகர், ராய்ப்பூர், டெல்லி, லூதியானா உள்பட 15 நகரங்களில் தொடங்கப்படும்.