திருவிழாக்கள் தமிழர்களின் ஏடறிந்த வரலாற்றுக் காலந்தொட்டு வளர்ந்து வருபவை. தமிழர் வாழ்வியலுடன் பின்னிப்பிணைந்தவை. சமூகத்தில் பன்முகத்தன்மைகள், பண்பாட்டு எச்சங்கள் போன்றவை இவற்றுள் பொதிந்திருப்பதை சமூக ஆர்வலர்கள் விரித்துரைப்பர். அண்மையில் கோவையில் நடந்து முடிந்த உலகத்தமிழ் மாநாடும் ஒரு பெரும் திருவிழாதான். கோவை இதுவரை கண்டிராத பெரும் திருவிழாதான். கோவை இதுவரை கண்டிராத பெரும் விழா.

கொங்கு நாடு, பழந்தமிழர்கள் ரோமாபுரியுடன் கொண்டிருந்த கடல் வாணிபத் தொடர்பை விளக்கும் தரவுகளைப் புதை பொருளாகக் கொண்ட செந்தமிழ் பரப்பாகும். இந்த நாட்டை ஊடருத்துச்சென்ற இராசராசன் பெருவழியில் உள்ள சித்தநாயக்கன் பாளையம் அடியேனது பிறப்பகம். இங்கு 100 ஆண்டுகளுக்கும் மேலாக இடையின்றி நடைபெற்றுவரும் மாகாளியம்மன் தேர் திருவிழாவின் வேறோர் பரிமாணமாகவே செம்மொழித்திருவிழா இருந்தது. நாற்பது ஆண்டுகளுக்குமுன் 1970 களின் நினைவுகளோடு மாநாட்டு மக்கள் திரளில் கலந்தலைந்தேன்.

செம்மொழித் திருவிழாவில் மிகப்பெரிய புத்தகக் கண்காட்சியும் இருந்தது. புத்தக விற்பனை மந்தமாக இருந்ததாகப் பதிப்பாளர்கள் பலர் தெரிவித்தார்கள். விலையும் ஒரு காரணம். உலகத்தமிழ் ஆராய்ச்சி நிறுவன வெளியீடுகள் குறைந்தவிலையில் உள்ளன. தஞ்சைத் தமிழ் பல்கலைக்கழக வெளியீடுகள் அதிக விலையில் உள்ளன. சென்னைப் பல்கலைக்கழக வெளியீடுகள் விலைக்குறிப்பை மேலொட்டி விலை மாற்றப்படாமல் விற்கப்பட்டன. பல வெளியீடுகள் இற்றுப்போனவை. தமிழ்நாட்டுப் பல்கலைகழகங்களின் தமிழ் வளர்ச்சிப் பணி ஏதுமில்லை என்று சொல்லத்தக்க அளவில்தான் வெளியீடுகள் இருந்தன.

கவியரங்குகள், பேச்சரங்குகள், பட்டிமன்றங்கள் தமிழக முதலமைச்சரைப் புகழ்ந்தே கழிந்தன. மாநாட்டுக்கு முன் மூன்று நாட்கள் மாநகரில் 11 இடங்களில் நாட்டுப்புறக் கலை நிகழ்ச்சிகள் சிறப்பாக நடைபெற்றன. நகர மக்கள் குடும்பம் குடும்பமாகச் சென்று கண்டு களித்தனர்.
மாநாட்டு கண்காட்சி அரங்குகள் நன்கு திட்டமிட்டு அமைக்கப் பட்டிருந்தன. சிந்துவெளி நாகரீகத்தின் முன்னோர் தமிழரே, சிந்துவெளி எழுத்துக்கள் பழந்தமிழே எனும் திண்ணமான உண்மையைத் தெரிவிக்கும் முகத்தான் அனைத்தும் அமைக்கப்பட்டிருந்தது பாராட்டத்தக்கதே! மாநாடு முடிந்து 7வது நாளும் இக்கண்காட்சியைக் காண ஆர்வமாக வந்து கடும் வெய்யிலையும் பொருட்படுத்தாது வரிசையில் பலமணிநேரம் நின்ற மக்கட்கூட்டத்தை அடியேன் கண்டதுமில்லை காணப் போவதுமில்லை!.... நிற்க...

செம்மொழி மாநாட்டின் பலன்களாக இருக்கவேண்டியவைகளைச் சுட்டிக்காட்டுவது தமிழ் சமூக நலனை நாடும் அடியேனின் கடமையாகும்.

1. உலகின் இலக்கிய வரிசையில் முதன்மையில் உள்ள 26350 வரிகளைக் கொண்டுள்ள சங்க இலக்கியப் படைப்புகளனைத்தும் தரமான பதிப்புகளாக அடக்கவிலையில் வெளியிடப்படல் வேண்டும்.
2. கணினித் தமிழுக்கு அதிக இன்றியமையாத தன்மை அளித்து ஆங்கிலத்துக்கு ஈடாக தமிழ் பயன்பாட்டிற்கு வரப் போர்க்கால அடிப்படையில் நடவடிக்கைகள் மேற்கொள்ளப்பட வேண்டும்.
3. ஒரு மொழியைப் படிப்பது, பேசுவது, தெரிந்துகொள்வது என்பதற்கும், அதன்வழிப் பாடங்களைப் படிப்பதற்கும் உள்ள வேறுபாடுகளை பரந்து பட்ட மக்களுக்கும் குறிப்பாக ஆங்கில மோகத்தில் அலையும் நடுத்தட்டு மக்களுக்கும் விளங்கவைக்க வேண்டும். இதன்மூலம் மனித ஆற்றல் வீணடிக்கப்படாமல் காலத்தைச் சேமித்து அறிவாற்றலை வளர்க்க உதவமுடியும்.
4. தமிழில் அனைத்துத் துறை நூலகளும், குறிப்பாக அறிவியல் சார்ந்த நூல்களும் உடனுக்குடன் மொழியாக்கம் செய்யப்படல் வேண்டும். கணினிகளை வைத்து இவற்றைச் சாதிக்கமுடியும் என்பதால் அதிற்சிறந்த வல்லுனர்களை வைத்துத் திட்டங்களைத் தீட்டவேண்டும்.
5. தமிழ் செம்மொழி நூலகள் அனைத்தும் உலகில் பெரிய அளவில் பயன்பாட்டிலுள்ள மொழிகளில் மொழியாக்கம் செய்யப்படல் வேண்டும்.
6. தமிழ்நாட்டிலுள்ள ஊடகத்துறையினர் (தொலைக்காட்சி, நாளிதழ், வார மற்றும் மாத இதழ்) தாமே முன்வந்து 'தமிங்கிலீசு' மொழியைப் பயன்படுத்துவதைத் தவிர்க்கவேண்டும். தமிழுயருவு பேசுவோர் நடத்தும் ஊடங்களே 'தமிங்கிலீசு' பயன்படுத்துவதில் முன்னணியில் இருப்பது வெக்கக்கேடானது, சோரத்தனமானது.
7. தமிழ்வழி உயர்கல்வி கற்போர்க்குக் கட்டணச்சலூகைகள் தரவேண்டும். வேலைவாய்ப்புகளில் முன்னுரிமை தரப்படவேண்டும்.
8. தமிழர்களின் வாழ்வியல் நெறிகளைக் காட்டும் பாடத்திட்டம் தமிழகமெங்கிலுமுள்ள அனைத்துக் கல்வி நிறுவனங்களிலும் முதுநிலைக்கல்வி முடிய கட்டாயமாக்கப்பட வேண்டும்.
9. தமிழர்களின் நாட்டுப்புறக் கலைவடிவங்கள் அனைத்தையும் செம்மையாக பதிவு செய்யவேண்டும். ஏட்டிலேறாமல் இருக்கும் நாட்டுப்புறக்கலைகள் அனைத்தும் உடனடியாக ஏடுபடுத்தப்படவேண்டும்.
10. பரந்துபட்ட அளவில் மிகச்செம்மையாக தொல்பொருளாய்வுகள், கடலாய்வுகள், தொல்தமிழர் நாகரீங்கங்கள் செழித்த பகுதிகளில் மேற்கொள்ளவேண்டும்.
11. துறைதோறும் அறிவியற் கைலைச் சொல்லாக்கப் பணிகள், அகரமுதலிகள் தொகுத்தல் நடைபெற்றுக் கொண்டே இருக்கவேண்டும். சங்கத் தமிழுக்குப்பின் சமயத்தமிழ், தமிழைக் காப்பதில் ஆகப் பெரும்பங்கு வகித்துள்ளன. மாலியம், சிவனியம், பவுத்தம், சமணம் பின்னாளில் கிறித்துவம், இசுலாம் ஆகிய சமயங்கள் பெரும்பங்களிப்புச் செய்துள்ளன. இதில் ஆயிரமாண்டுகளுக்குமுன் எம்பெருமானார் இராமனுசர் செய்த சேவை வியக்கத்தக்கது. வித்தான ஆழ்வார்களின் செம்மொழிகள் வைணவ ஆலயங்களில் நம் காதுகளில் தேனாகப் பாய்வது இன்றும் தொடர்கிறது. இது மேலும் தடையின்றித் தொடர வழிவகை செய்யவேண்டும்.
12. தமிழர்கள் கணித முறைகள், காலக்கணக்கீடுகள், வானியல் அறிவு போன்ற இன்னோரான அறிவியல் துறைகளையும் நின்றுபோன இடத்திலிருந்டு வளர்த்தெடுக்க வேண்டும். இதற்கான தரவுகளை அனைத்துத் துறைகளிலும் தேடி முறைப்படுத்த வேண்டும்.
13. பக்கவிளைவுகள் ஏதுமற்ற தமிழ் மருத்துவமாம் சித்த மருத்துவம் செழுமைப் படுத்தப்படல் வேண்டும். இன்னும் ஏடுபடாத இந்தத் துறை அறிவியல் அனைத்தும் ஏடுபடுத்தப்படல் வேண்டும். ஆங்கில மருத்துவத்துக்கு இணையாகத் தமிழ் மருத்துவம் வளரவேண்டும். கொல்லி மலைகளிலும் ஏனைய குறிஞ்சி முல்லை நிலங்களிலும் நடைபெறும் மூலிகைக் களவாடல்களையும், அழிப்பு வேலைகளையும் தடுத்து நிறுத்தி அவற்றுக்குப் பாதுகாப்பு அளித்திடல் வேண்டும். 15 ஆண்டுகளுக்குமுன் அடையாற்றிலேயே கைவிடப்பட்ட புற்று நோயாளியைக் குணமாக்கிய தமிழ்ச்சித்த மருத்துவரை அடியேன் அறிவேன்.
14. தமிழரின் பாரம்பரியச் சின்னகங்களனைத்தையும் தக்காரைக் கொண்டு பழுதுபார்த்துப் பாதுகாத்துப் பராமரிக்கப்படல் வேண்டும். தமிழகக் கோயில்களில் சமூகவரலாற்றுப் பெட்டகங்கள், நமது கட்டிடக்கலை, சிற்பக்கலை, இசைக்கலை போன்றவற்றை வெளிப்படுத்துவன. அனைத்துச் சமூகத்தினரதும் சிறியதும், பெரியதுமான அனைத்து பழைய கோவில்களும் தக்காரைக் கொண்டு பராமரித்துப் பாதுகாக்க ஏற்பாடுகள் செய்யப்படவேண்டும். தனியார் ஆக்கிரமிப்பிலுள்ள அனைத்துக் கோவில்களையும், சொத்துக்களையும் உடனடியாக பறிமுதல் செய்து வறுமையில் வேலையின்றித்தவிக்கும் உழவர்களுக்கும், இளைஞர்களுக்கும் குத்தகைக்கு விடப்படல் வேண்டும். நேர்மையாக வரும் இவ்வருவாயைச் சங்கத்தமிழ் வளர்க்கப்பயன் படுத்தவேண்டும்.
15. தமிழர்களின் பாரம்பரிய விளையாட்டுக்கள் போர்க்கலைகள் பேணி வளர்க்கப்படல் வேண்டும்.
16. தமிழ் செவ்வியல், சமய இலைக்கியங்களை மறுவாசிப்புக்கு உட்படுத்திப் புதிய தேடல்களுக்கு முனைவோர்களை ஊக்கப்படுத்த வேண்டும்.

'இவையெல்லாம் சாத்தியமா?' என்றால், நிச்சயம் சாத்தியமே. சிற்றூரிலிருந்து பெருநகரங்கள் வரை தமிழ்ப்பணியாற்றும் ஆர்வலர்கள், பல்துறை வல்லுநர்கள் உள்ளனர். இவர்களை அடையாளங்கண்டு ஒருங்கிணைக்க வேண்டும். கருத்துப்பரிமாற்றங்கள் நடைபெற வேண்டும். முதற்கட்டமாக மாவட்டங்கள்தோறும் செம்மொழி அலுவலங்கள் செயல்பட அரசு ஏற்பாடு செய்யவேண்டும். எது எப்படி ஆரம்பிக்கப் படவேண்டும் என்பதை நடைமுறையில் தீர்மானிக்கலாம்.

• புதிய

கருத்துரைகள் (0)

கருத்துரைக்கவும்

உங்கள் தொடர்பு விவரங்கள்:

பெயர்:

மின்னஞ்சல்: தெரிவிக்க அல்லதெரிவிக்கவும்

கருத்துரை:

தலைப்பு:

எழிற்குறிகள்:         -நிறம்-நீர்நீலம்கறுப்புநீலம்இளஞ்சிவப்புபழுப்புபச்சைஎலுமிச்சைகருஞ்சிவப்புகடற்படைநீலம்ஆலிவ்ஊதாசிவப்புவெள்ளிநீலப்பச்சைவெள்ளைமஞ்சள் -அளவு-மிகச்சிறியசிறியநடுவாந்திரபெரியமிகப்பெரிய

கருத்துரை:

Security

படத்திலிருக்கும் ஆங்கிலக் குறியீட்டுச்சொல்லை உள்ளிடவும்.

!joomlacomment 4.0 Copyright (C) 2009 Compojoom.com . All rights reserved."